Elogio di Facebook?

Fessobbucco.

Uno ‘e ‘sti juorne me scrivo a Fessobbucco,

m’avoto e ggiro e ‘o veco a tutte parte,

vogl’ì cercanno tutta chella ggente

c’aggio perduto tantu tiempo fa.

 

M’aggia ‘ntallià pur’ io ‘nu paro d’ore,

ì spuculianno dint’ê fatt’’e ll’ate,

aggia ‘nfizzà ‘nu nomme dint’ô spazzio

e aggia vedè ‘a risposta ca me da.

 

Voglio capì comme s’è ffatto chillo,

a chi cunosce chella tala perzona,

quanta cumpagne tene ‘a cumpagna mia,

‘e tutte cose me vogl’ì a ‘ntricà.

 

Aggia parià ‘ncopp’ê bbacheche ‘e ll’ate,

vaco scrivenno quatto fessarie;

‘na resatella ‘na parola ‘e spiccio,

pure ‘e nnuttate nce voglio passà.

 

‘Int’ô prufilo metto ‘a fotografia:

tutt’’a famiglia cu mmugliera e ffiglie,

pecchè chi ‘a vede nun se fa illusione,

songo ‘mpignato e nun se pò allargà.

 

Nun me voglio sentì ‘nferiore  a ll’ate,

me votto dint’ô uebbo e statte bbuono,

aggi’ apparà na migliarata ‘e ggente

e tutt’’e juorne me l’aggia ì a cuntà.

 

Me voglio fà  p’amice ‘e meglie nomme,

nun me ne ‘mporta si nunn ‘e ccunosco,

‘o nnicessario pe mme è ca quann’’o ddico

‘a tutte quante m’aggia fà mmirià.

 

E nun fa niente si faticammo ‘nzieme,

si ‘e ‘ncontro tutt’’e juorne ‘ncopp’ô posto,

si a quaccheduno quanno ‘o veco ‘o scanzo,

ma dint’â fessobbucco nce hadda stà.

 

‘Stu grande parlamiento virtuale

è ‘na ‘mmenzione ca me piace assaje,

parlà ‘a vicino mo s’è ffatto antico,

i’ so’ mmoderno che nce pozzo fà?

 

 

Gianna Caiazzo

1 maggio 2mila9

 

Elogio di Facebook?ultima modifica: 2009-05-04T10:32:00+00:00da dilloallautrice
Reposta per primo quest’articolo

6 pensieri su “Elogio di Facebook?

  1. ahahahah!!! proprio accussì maggia fa tutte e fatte e late e poi tutte hanna venì addo me e manna ammirà … ahahah!!!
    e questo è “fessobbucco”

    Dolce notte Gianna!

Lascia un commento

Il tuo indirizzo email non verrà pubblicato ma sarà visibile all'autore del blog.
I campi obbligatori sono contrassegnati *

*