Elogio di Facebook?

Fessobbucco.

Uno ‘e ‘sti juorne me scrivo a Fessobbucco,

m’avoto e ggiro e ‘o veco a tutte parte,

vogl’ì cercanno tutta chella ggente

c’aggio perduto tantu tiempo fa.

 

M’aggia ‘ntallià pur’ io ‘nu paro d’ore,

ì spuculianno dint’ê fatt’’e ll’ate,

aggia ‘nfizzà ‘nu nomme dint’ô spazzio

e aggia vedè ‘a risposta ca me da.

 

Voglio capì comme s’è ffatto chillo,

a chi cunosce chella tala perzona,

quanta cumpagne tene ‘a cumpagna mia,

‘e tutte cose me vogl’ì a ‘ntricà.

 

Aggia parià ‘ncopp’ê bbacheche ‘e ll’ate,

vaco scrivenno quatto fessarie;

‘na resatella ‘na parola ‘e spiccio,

pure ‘e nnuttate nce voglio passà.

 

‘Int’ô prufilo metto ‘a fotografia:

tutt’’a famiglia cu mmugliera e ffiglie,

pecchè chi ‘a vede nun se fa illusione,

songo ‘mpignato e nun se pò allargà.

 

Nun me voglio sentì ‘nferiore  a ll’ate,

me votto dint’ô uebbo e statte bbuono,

aggi’ apparà na migliarata ‘e ggente

e tutt’’e juorne me l’aggia ì a cuntà.

 

Me voglio fà  p’amice ‘e meglie nomme,

nun me ne ‘mporta si nunn ‘e ccunosco,

‘o nnicessario pe mme è ca quann’’o ddico

‘a tutte quante m’aggia fà mmirià.

 

E nun fa niente si faticammo ‘nzieme,

si ‘e ‘ncontro tutt’’e juorne ‘ncopp’ô posto,

si a quaccheduno quanno ‘o veco ‘o scanzo,

ma dint’â fessobbucco nce hadda stà.

 

‘Stu grande parlamiento virtuale

è ‘na ‘mmenzione ca me piace assaje,

parlà ‘a vicino mo s’è ffatto antico,

i’ so’ mmoderno che nce pozzo fà?

 

 

Gianna Caiazzo

1 maggio 2mila9

 

Elogio di Facebook?ultima modifica: 2009-05-04T10:32:00+02:00da dilloallautrice
Reposta per primo quest’articolo

6 pensieri su “Elogio di Facebook?

  1. pe’ caso so trasuto dint”o sito tuie. Complimenti vivissimi! Fessobucco m’ha fatto muri’. Spero ‘e leggere ate ccose ‘e te! Gianna si grande!!!!!!

  2. ahahahah!!! proprio accussì maggia fa tutte e fatte e late e poi tutte hanna venì addo me e manna ammirà … ahahah!!!
    e questo è “fessobbucco”

    Dolce notte Gianna!

  3. …io sto già parianno ‘a ‘nu sacco ‘e tiempo e tu, quanno ce viene…? …una comme a te, nun pò manca’…! Un abbraccio.

  4. A dire bello è poco

    meravigliosamente bellissimo
    come lo è la lingua Napoletana.

    Brava Gianna.
    Ciao da Giuseppe.

I commenti sono chiusi.