Chiacchiere ‘e Carnevale. (Pampuglie)
‘E ddose pe qquatto perzone:
300 gramme ‘e farina
50 gramme ‘e zuccaro
2 ove
50 gramme ‘e ‘nzógna o ‘e bburro
¼ ‘e bustina ‘e liéveto a ppóvere
‘Na bella presa ‘e vino bianco asciutto oppure ‘e liquore (annese, marsala o limunciello)
‘Nu pizzeco ‘e sale
Uoglio pe ffriere.
Zuccaro a vvelo.
Comme se fanno:
Facite ‘a funtanella cu ‘a farina ‘ncopp’â tavula, mettitece ll’ove, ‘o zzuccaro, ‘a ‘nzogna, ‘o lliquore,’o ssale, ‘o lliéveto e ‘mpastate buono.
Mettite ‘o ‘mpasto dint’a ‘nu cannavaccio e ffacitelo arrepusà pe ‘na mez’ora. Doppo stennitelo cu ‘o laganaturo pe ‘na duppiezza ‘e duje o tre millimetre. Facitene strisciulelle larghe tre o quatto centimetre e llonghe ‘na duzzina e ffacitece ‘nu paro e ‘ntacche mmiezo.
Frijìtele ‘int’a uoglio abbundante e aizàtele quanno songhe bionde. Facìtele sculà ‘ncopp’a ‘nu foglio ‘e carta e quanno so’ ttiepete sguazziatele cu ‘o zzuccaro a vvelo.
Salute!
Gianna Caiazzo © riproduzione riservata