Cade ‘na stella.

Cirche na stella  ca cade dint’ô cielo

c’abbruscia e corre dint’ô manto niro

se stuta fino all’urdemo respiro

felice ‘e te fa ‘o meglio d’’e regale

 

E’gioia pe ll’uocchie è mmèle p’’o penziero

e  ‘o dono ‘e t’avverà ‘nu desiderio

mentre ca more te lascia ‘na speranza

ca ‘o suonno tuojo putesse essere ovèro.

                        

 

 

 

Gianna Caiazzo

 12 agosto 2mila9

‘A forza d”e pparole.

 

Te dico ‘na parola chiatta chiatta

d’’a lengua mia, cusuta su misura

te dico chella e nun ne cerco n’ata

pecchè è  precisa chello c’aggia dì.

 

Nisciuna voce perbene e ‘mpernacchiata

‘e ‘nu vucabbulario d’’o ttaliano 

me po’ sservì pe tte pittà ‘o penziero

ca m’aggio fatto dint’â capa mia.

 

Putesse truvà ‘o tèrmene cchiù bbello

‘o cchiù  moderno oppure ‘o cchiù sciscì

ma mo t’’o schiaffo cu ’o nnapulitano

e meglio ‘e chesto nunn ‘o ppuò capì!

 

            

  Gianna Caiazzo 

 9 agosto 2mila9